Во деновите на Вознесение Христово, на голем православен празник, се одржа свечена литија и пренос на моштите на Свети Зосим Тумански – чудотворец и заштитник на многу верници. Божествената Литургија ја предводеше српскиот патријарх г.г. Порфириј, во сослужение со митрополити и епископи од целата Српска православна црква и пошироко. По завршувањето на Литургијата, моштите на светецот беа свечено пренесени до неговата испосница.
Ова беше несекојдневно духовно искуство, во кое учесниците имаа можност да присуствуваат на вистински благословен собир – но и повеќе од тоа.
Посетени беа два манастири во една тура – Тумане и Нимник
По посетата на манастирот Тумане, турата продолжи кон уште една света земја – манастирот Нимник, кој носи длабока и потресна легенда. Имено, за време на турското владеење, девојче од блиската околина одбило да открие каде се наоѓа манастирот, знаејќи дека Османлиите ќе го уништат. На прашањето каде се наоѓа манастирот, одговорила: „Нишћу нимик“ (во превод: „Ништо не знам“). За жал, била убиена на самото место, а денес на нејзиниот гроб се наоѓа капелата „Светиња“, дел од манастирскиот комплекс.
Манастирот Нимник е место на духовна тишина, молитва и исцеление. Во негова близина се наоѓа извор за кој се верува дека има лековити својства, а патниците се секогаш дочекани со мед и изворска вода.
Ние ви овозможуваме вакви единствени патувања, каде што се спојуваат духовноста, историјата и традицијата. Со еднодневна тура ги посетувате два свети манастири и доживувате моменти на внатрешен мир и благослов.